«Հիդրոօդերևութաբանական գործունեության մասին» ՀՀ օրենքում լրացումներ կատարելու մասին» նախագծով առաջարկվում է լիազոր մարմնին վերապահել օդերևութաբանության և եղանակի կանխատեսման բնագավառում ծառայություններ մատուցող ֆիզիկական և իրավաբանական անձանց ռեեստրի վարման իրավասություն:
Օրենքում առաջարկվող լրացումը պայմանավորված է օդերևութաբանության և եղանակի կանխատեսման բնագավառում անձանց հաշվառման անհրաժեշտությամբ, ԵԱՏՄ շրջանակում ծառայությունների միասնական շուկայի ձևավորմամբ, շուկայի մասնակիցների վերաբերյալ տվյալների փոխանակմամբ:
Նախագիծը քննարկվել է մայիսի 2-ի ԱԺ տարածաշրջանային և եվրասիական ինտեգրման հարցերի մշտական հանձնաժողովի նիստում:
ՀՀ շրջակա միջավայրի նախարարի տեղակալ Գայանե Գաբրիելյանը տեղեկացրել է, որ նախագծի ընդունումը կապահովի օրենքի ներդաշնակությունը ԵԱՏՄ իրավակարգավորումներին:
«ԵԱՏՄ բոլոր երկրներն այս գործընթացը իրականացրել են: Միակ երկիրը, որը դեռ այդ պարտավորությունը չի կատարել, Հայաստանի Հանրապետությունն է»,- նշել է նախարարի տեղակալը։
Նախարարի տեղակալի խոսքով` առաջինից երկրորդ ընթերցում կատարվել են խմբագրական բնույթի փոփոխություններ:
Հանձնաժողովը նախագծին տվել է դրական եզրակացություն: