Շրջակա միջավայրի նախարար Հակոբ Սիմիդյանն ընդունել է Ֆինլանդիայի արտակարգ և լիազոր դեսպան Կիրսթի Նարինենին և Հայաստանում Ֆինլանդիայի պատվավոր հյուպատոս Թիմոթի Դեյվիդ Սթրայթին։
Հանդիպման մեկնարկին նախարարը տիկին դեսպանին է ներկայացրել մայիսի 25-26-ը տեղացած հորդառատ անձրևներով պայմանավորված հեղեղումների պատճառով առաջացած արտակարգ իրավիճակի հետևանքները։
Անդրադարձ է կատարվել մասնավորապես վաղ նախազգուշացման համակարգին և այդ համատեքստում հիդրոօդերևութաբանական ծառայությունների մոնիթորինգային կարողությունների զարգացմանը և հզորացմանը։
Կողմերը տեսակետներ են փոխանակել մոնիթորինգի համակարգի արդիականացման շուրջ համատեղ ծրագրերի իրականացման և փորձի փոխանակման հնարավորությունների շուրջ։
Քննարկվել է անտառտնկման և անտառվերականգնման խնդրին։ Տիկին դեսպանին է ներկայացվել «Հայանտառ» ՊՈԱԿ-ի գործունեությունը, Հայաստանում անտառային ոլորտում գույքագրված խնդիրները, առկա վիճակի բարելավման ու անտառապատ տարածքների վերականգնման ուղղությամբ տարվող աշխատանքները։
Հիշեցնենք, որ Շրջակա միջավայրի նախարարության համակարգմամբ և Չեխիայի Հանրապետության ու Ֆինլանդիայի Հանրապետության կոնսորցիումի կողմից իրականացվել է «Հայաստանում կենսաբազմազանության ուժեղացված պահպանությունն ու կայուն օգտագործումը եվրոպական չափանիշներին համապատասխան» Թվինինգ ծրագիրը: Ծրագրի նպատակն էր հզորացնել շրջակա միջավայրի նախարարության կարողությունները կենսաբազմազանության պահպանության և կայուն օգտագործման ոլորտում՝ ՀՀ-ԵՄ Համապարփակ և ընդլայնված գործընկերության համաձայնագրի (CEPA) և դրա ճանապարհային քարտեզի համաձայն ստանձնած պարտավորությունները կատարելու համար:
Անդրադարձ է կատարվել ջրային դիվանագիտությանը, քննարկվել են տեղեկատվության փոխանակման և ոլորտում ապագա ջանքերի միավորմանն առնչվող հարցեր:
Հանդիպման ավարտին որոշվել է նման քննարկումները դարձնել պարբերական՝ նպատակ ունենալով համատեղ ուժերով ապահովել ծրագրերի ավելի արդյունավետ իրականացում։